Pages

Tuesday, January 1, 2013

నాకు సంతస మొసంగుమా - రామచంద్ర!

శ్రీ గురుభ్యోనమః

నంద నందనుఁడ! గోవింద! నృసింహావ
                తార! ఆనంద! సత్యస్వరూప!
దామోదరా! ముకుందా! వాసుదేవ!
                ద్మాక్ష! సీతాపతీ! అవ్యయుండ!
పాపసంహారకా! పతితపావనరూప!
                సంసార విస్తార జలధిదాట
గాఁజేయు, గంభీర కర్ణధారుండ! శ్రీ
                కృష్ణావతారుఁడౌ! విష్ణుదేవ

కాంతిచే, మనోహరుఁడవై గ్రాలువాఁడ!
అచ్యుతానంత! శ్రీ రామ! ఆదిదేవ!
నిత్యతాపత్రయంబు ఖండించి, నాకు
సంతస మొసంగుమా - రామచంద్ర సతము.

(శ్రీ రామ కర్ణామృత ఆంధ్రానువాదం నుండి)

శ్రీ రామ చంద్రా! నీ ప్రతీ నామము, చేష్టితము, అవతారము, లీల, ఇంచుకైనను సరే అవి పాప సంహారకములు, దీనుల యెడ ఉద్ధరణ కారకములు.
పతిత పావనా! ఎడతెఱిపిలేని తాపత్రయముల వలన కలిగిన దుఃఖముచే అగాధము వంటి చీకటియైన అజ్ఞానమునందు తిరుగువాడను. గంభీరమైన చెవులు కల (ఎంత మంది ఒకేసారి కోరికలు కోరినా అందరి కోరికలూ ప్రత్యేకంగా వినగలిగినంత విశిష్ఠమైన చెవులు కలవాడా) కృష్ణా! నా తాపత్రయములను త్రుంచి, అతి పెద్దదై దాట సాధ్యముకాని సంసార మనే సముద్రాన్ని దాటింపచేసి,నిత్యము, శాశ్వతము, అనంతము ఐన ఆనందమును నా స్వస్థితిగా చేయుమో తండ్రీ! దాశరథీ!


~~~~~~~~~~~~~~~~~~~~~~
ధర్మస్య జయోస్తు - అధర్మస్యనాశోస్తు
जय जय शंकर हर हर शंकर

No comments:

Post a Comment