ఎల్లో మనసులున్న మనుష్యులూ ఉంటారు!

ఒక్కోరుంటారు మన జీవితాలమీద తమ అభిప్రాయాలు చెప్తారు, అవి అసంబద్ధమైనవని తెలిసినా గౌరవంకొద్దీ చాలా సంతోషం అని చెప్పి వచ్చేస్తే ఊరుకోరు. తన అభిప్రాయం వినలేదని అది పది మంది అభిప్రాయమనీ, మీగురించి పదిమందీ ఇలా అనుకుంటున్నారని తన అభిప్రాయాన్నే పది మంది దగ్గరికీ వెళ్ళి చెప్పి. దాన్నే తిరిగి మీ గురించి పదిమందీ ఫలానా అభిప్రాయం వ్యక్తంచేస్తున్నారని చెప్పి, ఆ పది మంది అభిప్రాయంగా దాన్ని సృష్టిచేసి తానేదో నిన్నుద్ధరించేవాడిలా పెద్దలముందు బిల్డప్ ఇచ్చి నిన్ను పదిమంది తప్పుగా అనుకోకుండా కాపాడడానికి కష్టపడేలా బిల్డప్లిస్తారు. అవి విన్న పెద్దలతో ఇది నిజమేనేమో పదిమందీ అలా అనుకుంటున్నారేమో మీగురించి ఆలోచించండి అని అనిపిస్తారు. తస్మాత్ జాగ్రత! న్యూసులు చదవట్లేదూ... ఎల్లో జర్నలిజమేకాదు నిత్యం మమేకమైయ్యే ఎల్లో మనసులున్న మనుష్యులూ ఉంటారు!

-శంకరకింకర

నిలిచే చైత్యాన్ని, ఓ దూర్వాంకురాన్ని!

చిరు గాలికి వణికే చిగురుటాకును కాను
ఎదురొడ్డినిలిచే చైత్యాన్ని!

ప్రభంజనానికి వెరసే అడవి మ్రానుని కాను 

తలయెత్తి నిలచే దూర్వాంకురాన్ని!

గంభీరం నా ఆహార్యం
వినయం నా భూషణం

తిలకం నా దర్పం
శిఖయే నా ధర్మం

మాటే నా ఆయుధం
భావం నా కవచం

మౌనం నా తత్వం
తపం నా జీవం

వెరసి,
నిలిచే చైత్యాన్ని,
ఓ దూర్వాంకురాన్ని!

శంకరకింకర

'చిత్‍'తు రాతలు గీతలు

నువ్వేం పెద్ద ధర్మాత్ముడివా? శ్రీరాముళ్ళా బిల్డప్ ఇవ్వకు!

నువ్వేం పెద్ద పండితుడివా? మహామహోపాధ్యాయలా బిల్డప్ ఇవ్వకు

నువ్వేం పెద్ద సిద్ధాంతివా? వరాహమిహిరుడు ఆర్యభట్టుల్లా బిల్డప్ ఇవ్వకు

నువ్వేం పెద్ద సాహితీవేత్తవా? విశ్వనాథవారిలా ఫోజు కొట్టకు

నువ్వేం సంగీతజ్ఞుడివా? నువ్వేం ఎమ్మెస్సూకాదు బాలమురళీకాదు

నువ్వేం...... వా? నువ్వేం...... కాదు, కాస్త తగ్గు.

ఔను, నేను పైవేవీ కాదు. కేవల సాధకుణ్ణి, అతి చిన్నవాణ్ణి.

సరే ఇంకా చెప్పేదా... ధర్మాత్ములందరికీ రాముడాదర్శమే కానీ అందరూ రాముళ్ళే కానక్కరలేదు.

మహామహోపాధ్యాయలేకాదు ఏ బిరుదులు డిగ్రీలు పట్టాలు లేకున్నా పండిన పండితులెందరో,

జీవనగమనానికి ఆర్యభట్టు వరాహమిహిరుడేకాదు రోజువారీ పంచాంగ చూసి అన్వయం చేసుకోగలిగినా పండిపోవచ్చు.

కవికులనాథ విశ్వనాథయే కాదు కాళిదాసైనా కూడా అక్షరాలతోనే మొదలు

ఎమ్మెస్సూ, బాలమురళివంటి సంగీతమేకాదు జోలపాడే తల్లి, చెల్లి, భార్య నువ్వూ సంగీతజ్ఞులే....

శ్యామకృష్ణుని సంగీతానికి జీవించి ఉండగానే పెద్దపేరు రాలేదు ఐనంత ఎవరికీ తక్కువ కాదు అందరికన్నా ఎక్కువే...

ఎందరో మహానుభావులు అందరికీ సాష్టాంగాలు, ఎందరెందరికీ పద్మాలూ, రత్నాలు రాలేదు దానర్థం వచ్చినవాళ్ళు ఎక్కువకాదు రానివాళ్ళు తక్కువకాదు.

పోన్లే అది వదిలెయ్.... చెప్పినా అర్థంకాకపోవచ్చు... ఆలోచనా పరిథి విస్తృతమైతే తప్ప అర్థం అవదు.....

"నువ్వదా, నేనిది" అని ఎంచడాన్ని వదలుతున్నవాణ్ణి

"నువ్వదా, నేనిది" అని ఎంచడాన్ని ఎదిరిస్తున్నవాణ్ణి

వెరసి "నువ్వుకు నేనుకు " మూలాన్ని

పై ఏ ముసుగూ లేని వాణ్ణి,

అవేవీ దాయలేనివాణ్ణి

అణగి ఉండేవాణ్ణి.

-శంకరకింకర

సజ్జన సంగం పొందినా ... తస్మాత్ జాగ్రత

దుర్లభం త్రయమేవైతత్ దైవానుగ్రహ హేతుకమ్ !

మనుష్యత్వం ముముక్షుత్వం మహా పురుష సంశ్రయః !!

సజ్జనుల సంగం దుర్లభమైనది. అది దొరికనప్పుడు తామర కొలనులో ఇతర జీవాల్లా కాకుండా అడవినుంచి వచ్చి ఆ తామరలలోని మధువును గ్రోలే భ్రమరంలా ఉండగలిగిననాడు సజ్జనులను, సత్పురుషులను ఆశ్రయించినవారి జన్మ సార్థక్యాన్ని పొందుతుంది. అలాకాక, సజ్జన సంగం పొందినా అంతశ్శత్రువులకు లొంగిననాడు, పొందవలసినదానియందార్తి లేక, ఆ తామరతూడు చుట్టూ బురదలో తిరగడంలోనే ఆనందం వెతుక్కోవడం అంటే,  ఆ కొలనులో తామరచుట్టూ తిరిగే ఇతర ప్రాణుల వంటి మరో జీవితమే! తస్మాత్ జాగ్రత శంకరకింకరా!

భస్మ భూషితాంగ దేవ చంద్రశేఖరా

భస్మ భూషితాంగ దేవ చంద్రశేఖరా
అరుణ కిరణ శోభితా చంద్రశేఖరా
కరుణా రస సాగరా చంద్రశేఖరా
కామ బాణ నాశకా చంద్రశేఖరా
కామ కోటి భూషణా చంద్రశేఖరా
కమల నయన పూజితా చంద్రశేఖరా
విమల మూర్తి ధారకా చంద్రశేఖరా
కృపా కటాక్ష శోభితా చంద్రశేఖరా
పార్వతీ మనోహరా చంద్రశేఖరా
భస్మ భూషితాంగ దేవ చంద్రశేఖరా
అమర జన సేవితా చంద్రశేఖరా
సత్య వ్రత క్షేత్ర వాసి చంద్రశేఖరా
దేవ సింధు శేఖరా చంద్రశేఖరా
నీల గరళ శోభితా చంద్రశేఖరా
కామకోటి దేశికా చంద్రశేఖరా
కాల దర్ప నాశకా చంద్రశేఖరా
నాగ రాజ భూషణా చంద్రశేఖరా
రామ రామ రామ రామ చంద్రశేఖరా
రామ దాస సేవితా చంద్రశేఖరా
కామకోటి పూజ్య పీఠ చంద్రశేఖరా
శశి కిషోర శేఖరా చంద్రశేఖరా
దక్ష యజ్ఞ ధ్వంసకా చంద్రశేఖరా
సకల శాస్త్ర సన్నుతా చంద్రశేఖరా
నిగమ మార్గ గోచరా చంద్రశేఖరా
భస్మ భూషితాంగ దేవ చంద్రశేఖరా

(Collection)

ధనుర్మాసమ్ ప్రాచీన వ్రతం

శ్రీ గురుభ్యోనమః

ధనుర్మాసమ్ తిరుప్పావైతో మాత్రమే మొదలవ్వలేదు.. అంతకన్నా ప్రాచీన వ్రతం ఇది..

ధనుర్మాసం కాల విభాగం చేసినప్పటినుండీ ఉన్నది. తిరుప్పావైతో మొదలవ్వలేదు. తిరుప్పావై పాశురాలు గోదామాత యొక్క మధుర భక్తి ప్రకటనంగా మనకి తదనంతర కాలంలో అందించబడ్డవి. అవి తమిళ భాషలో రచింపబడినవి. ధనుర్మాసంలో (సూర్యుడు ధనస్సు రాశిలోకి చేరిన మరునాటినుండి మకర సంక్రాంతి వరకు) తెల్లవారుఝామున విష్ణు ఆరాధన, శివాభిషేకం తులసి పూజ, గోపూజ విధించబడ్డాయి. చలిని తట్టుకోలేని ఆర్తులకు అగ్నిదానం, వస్త్ర కంబళి దానం విధింపబడ్డాయి. 

ఈ మాసంలో ద్రవిడ దేశంలో తిరుప్పావై (విష్ణు సంబంధం) - తిరువెంబావై (శివ సంబంధం) తమిళ స్తోత్రాలు పఠిస్తారు. వైష్ణవ సాంప్రదాయంలో పూర్వాచార్యులవల్ల ముఖ్యంగా దక్షిణ భారతంలో ఎక్కువగా దేవభాషకన్నా తమిళ ప్రభావం తీవ్రంగా ఉన్నకారణాన ఈ ప్రాంతాల్లోని వైష్ణవాలయాల్లో తిరుప్పావై ప్రాభవం ఎక్కువ. ఐతే తిరుప్పావై రచించిన కాలానికి మునుపే ఈ ధనుర్మాస వ్రతం ఎప్పటినుంచో కొనసాగుతూ వస్తున్నది. ఈ కాలంలో విష్ణు పురాణం, భాగవతం, ఇతర పురాణాలు పారాయణ చేయాలని బ్రహ్మగారు నారదునిద్వారా బోధించారు.

ఈ ధనుర్మాసంలో ఐదు నాణేల ఎత్తు విష్ణుమూర్తిని స్థాపించి ఈ నెలంతా అభిషేకార్చనాదులు పంచామృతాలు తులసీ జాతి పుష్పాలతో నిర్వహించి మిరియాలు, పెసరపప్పు, లవణం బియ్యం కలిపి వండిన పొంగలి, ఆవుపాలతోచేసిన పాయసం, దధ్యోదనం నివేదన చేయాలి. ఈ వ్రతం ఆచరించేవారు విష్ణుపూజతోపాటు తులసి పూజ, గోపూజ నిర్వహించాలి. చివరి రోజున ఆ మూర్తిని భోజన దక్షిణ తాంబూలాదుల సహితంగా పురోహితునికి గానీ సద్బ్రాహ్మణుకిగాని ఇచ్చి ప్రదక్షిణ నమస్కారాలు చేయాలి. 

ఈ మాసంలోనే తెల్లవారు ఝామున 3 గంటల ప్రాంతంలో శివాభిషేకం అద్భుతంగా చేస్తారు అతి ముఖ్యంగా ఆర్ద్రా నక్షత్రం ఉన్నరోజు మరింత శోభాయమానంగా నిర్వహిస్తారు శివాలయాల్లో.

వ్యాసపూజ చేయకపోతే ఈ వ్రతం నిష్ఫలం

----------------------------------------------------

ఈ ధనుర్మాసంలో ఒకసారైనా వ్యాసపూజ చేయాలి, వ్యాసపూజ చేయకపోతే ఈ ధనుర్మాస వ్రతం నిష్ఫలమని చతుర్ముఖబ్రహ్మ నారదునికి ధనుర్మాస వైశిష్ఠ్యంలో చెప్పారు.

సర్వం శ్రీ రంగరాజ - శ్రీ నటరాజ పాదారవిందార్పణమస్తు

- శంకరకింకర

స్థాయి బేధాల గురించి..

స్థాయి బేధాల గురించి మాట్లాడేవాళ్లని చాలామందిని చూస్తుంటాం... (నాలాంటి టుమ్రీలైతే బోల్డుమంది). నిజానికి ఆ స్థాయి ఈ స్థాయి అని బేధాలు మాట్లాడే ఎవరుకూడా అసలు చేరవలసిన స్థాయిని చేరకుండా ఉన్నవారే. నూటికి తొంభైమందికి అసలు విషయంలో ప్రవేశమే ఉండదు కానీ ఈ కవిత స్థాయి కాదండీ ఆ పాట ఈ స్థాయి కాదండీ ఈనకి పూజలో అంత స్థాయి లేదండీ అంటూ అతిఎక్కువగా విషయ పరిజ్ఞానంలేనివారే మాట్లాడేస్తారు. ముఖ్యంగా ఆధ్యాత్మిక విద్యలలో ఇది ఎక్కువ. అసలు ఆంతర స్థాయి ఎవరికి తెలుస్తుంది? "ఆధ్యాత్మ విద్యలలో ఎవరి స్థాయి ఏంటి అనేది పరసంవేద్యం కానేకాదు అది స్వసంవేద్యం". అది తెలిసినవారు స్థాయీ బేధాలగురించి మాట్లాడరు. మాట్లాడుతున్నారంటే తరణం సంగతి దేవుడెరుగు ఒడ్డున ఇసకలో గవ్వలేరుకుంటున్నవారే... పైన చెప్పినట్లు నాతో సహా!

-శంకరకింకర

తపోజలాలను

తపో జలాలను సిరాగ మార్చి
పదునెక్కిన మనో కలాన్ని ముంచి వ్రాస్తానొక శాసనం!

ధర్మపరుల ఆలోచనలనావాహన చేస్తూ
ఉపాసకుల ఊపిరులతొ కొత్త శ్వాస తీస్తున్నా!

దృశ్యమే తామైన సమాధి స్థితి పొందిన ద్రష్టల దృష్టిని కోరుతు ఉన్నా!

మాటల చేతల అంతరాలనూ
చండీసింహపు గర్జనలతో ప్రశ్నిస్తున్నా!

శివపార్వతుల తాండవ కేళీ
విలాస సాక్ష్యమై కాలి అందెగా సత్యాన్నై నిలుస్తున్నా!

-శంకరకింకర (10-01-2018)

భవాని త్వం... భవానిత్వం

దేశిక పాద స్మరణం!

ఆ జగజ్జనని అనుగ్రహంలేనివారు ఎంతటి నీచ కార్యములను చేయడానికైనా వెనుకాడరు. గురు స్త్రీ బాల వృద్ధులనే బేధం లేకుండా అష్టాదశ వ్యసనాలయందూ మునిగి తేలుతుంటారు. అష్టాదశ వ్యసనాలేవి అంటే మహానుభావుడైన మహర్షి మనువు ధర్మ సూత్రాలలో వీటి గురించి చెప్పి ప్రతి మనిషి ప్రయత్న పూర్వకంగా విసర్జించి దూరంగా ఉండాలని జాగ్రత్త చెప్పారు.

మృగయాక్షో దివాస్వాపః పరివాదస్త్రియోమదః

తౌర్యత్రికం వృధాట్యాచ కామజో దశకోగణః

పైశున్యం సాహసం ద్రోహ ఈర్ష్యాసూయార్ధ దూషణేః

వాగ్దండనంచ పారుష్యమ్ క్రోధజోఽపి గణోఽష్టకః (మనుస్మృతి)

వేటాడడం, జూదం, పగలు నిద్రించడం, నిందాలాపనలు చేయడం, స్త్రీలౌల్యం, గర్వం, దుష్టమైన ఆలోచనలను రేకిత్తించు నృత్య , గీత, వాద్యములందు విపరీతమైన ఆసక్తి, పని పాట లేక తిరుగుచుండుట-ఈ పది కామజనక వ్యసనములు.

చాడీలు చెప్పుట, దుస్సాహసము, సాధుజనులపై ద్రోహచింత, పరుల కీర్తిని చూసి అసహనము ఓర్వలేని తనము కలిగియుండుట, ఇతరుల గుణములందుదోషములు ఆరోపించి చులకన చేయుట తద్వారా కీర్తి హననము , నీచముగా కఠినముగా మాట్లాడుట అను ఈ ఎనిమిది క్రోధజములైన వ్యసనములు.

పై వ్యసనాలు ఎవరియందైనా స్పష్టంగా ప్రకటంగా కనిపిస్తున్నాయంటే దానర్థం ఆ జగజ్జనని యొక్క అనుగ్రహానికి అటువంటి వ్యక్తులు పాత్రులు కారు అని మనకు సప్తశతీత్యాదిగా అమ్మవారి స్తుతులలో తెలుస్తున్నది.

ధర్మ్యాణి దేవి సకలాని సదైవ కర్మా- ణ్యత్యాదృతః ప్రతిదినం సుకృతీ కరోతి !

స్వర్గం ప్రయాతి చ తతో భవతీప్రసాదా- ల్లోకత్రయేఽపి ఫలదా నను దేవి తేన!!

అమ్మా ధర్మ కార్యాలను ఎవరు చేయగలరో తెలుసా, నీ దయ ఉన్నవాడు, నువ్వు ఎవరిని అనుగ్రహిస్తావో ఆ వ్యక్తి మాత్రమే దైవీ గుణ సంపత్తిని పెంచుకొని, ధర్మ కార్యములను నిర్వర్తించగలడు. నీ అనుగ్రహం ఉన్నవారే సుకృతములను చేయగలరు. అనగా, అనుగ్రహం లేనివారు దుష్కృత్యములను నిర్వహిస్తూ, పర ధనయశోకాంతలనాశిస్తూ వివేక హీనుడై, ధర్మ హీనుడై ప్రవర్తిస్తాడు. ఏ వ్యక్తి యైనా , అధార్మికమైన కార్యం చేస్తున్నాడు, స్త్రీబాలవృద్ధసాధుభక్తజనులలో ఏ ఒక్కరి గురించి చెడు ఆలోచన చేస్తున్నా దానికి తాత్పర్యం ఆ వ్యక్తికి జగజ్జనని అనుగ్రహం లోపించింది అని గుర్తు. ఎవరైతే నీ అనుగ్రహాన్ని పొందడం వల్ల దైవీ గుణసంపన్నులై మంచిని పెంచి పంచుతారో, అందరినీ ఆదరిస్తారో అటువంటివారు స్వర్గాది త్రిలోకములే కాదు నీ చరణ సీమనే పొందెదరు.

దుర్గే స్మృతా హరసి భీతిమశేషజన్తోః స్వస్థైః స్మృతా మతిమతీవ శుభాం దదాసి!

దారిద్ర్యదుఃఖభయహారిణి కా త్వదన్యా సర్వోపకారకరణాయ సదాఽఽర్ద్రచిత్తా!!

అమ్మా, నీ భక్తుల సంకటములెల్లను పోగొట్టి నిన్ను సదా తలిచి నిలిచేవారికి భయాన్ని, బాదను తొలగించి స్వస్థతను చేకూర్చెదవు. అలాంటి వారికి మరింత మంచి బుద్ధిని కటాక్షించి నీ మార్గమునుండి మరలని స్థిరబుద్ధిని ప్రసాదించెదవు.  నీవు ఎలాంటి వారికైనా మంచి చేయాలనే తలపు గలదానవు, కానన్జేశి నీ భక్తులకు గూడా భవాని త్వం... భవానిత్వం గామారి అటువంటి లక్షణములే అలవడి అపకారులను కూడ ఉపేక్షించి ఉపకారమే చేయుదురు. నీ అనుగ్రహ వృష్టిచే దారిద్ర్య దుఃఖాలను తాపార్తిని హరించడంలో నీకన్నా పణ్డితులెవరున్నారు లోకంలో అని నీదరి చేరిన వారిని అక్కున చేర్చుకుందువు. సత్యము సత్యము సత్యము.

- శంకరకింకర

ధీరుడెప్పుడూ స్వశక్తిపైనే నిలబడతాడు

శ్రీగురుభ్యోనమః

శ్రీరాముడికన్నా అవమానం పొందినవారూ, కష్టపడ్డవారూ లేరు. ఆఖరికి వెలివేయబడి నలుగురు మంత్రులతో కలిసి కాలం వెళ్ళదీస్తున్న వానర నాయకుడు సుగ్రీవుడు కూడా శ్రీరాముని పరాక్రమానికి ప్రజ్ఞకి పరీక్ష పెట్టాడూ. అది నాస్థాయి కాదని అలగలేదు, రాముడు. రావణుడైతే మరీ ఘోరంగా పిరికివాడు, మనికిమాలిన రాముడన్నాడు  నీ ప్రజ్ఞ, నీ విశేషం, నీ ప్రతిభ, నీ నేర్పరితనం లోకులెరగకపోవచ్చు, తెలియక నిన్ను తక్కువగా ఎంచవచ్చు నిర్లిప్తత పొందక, ఓ నవ్వు నవ్వుకుని, నిన్ను నువ్వు మెఱుగు పెట్టుకునే అవకాశంగా తీసుకో..  గుర్తింపు కతీతంగా ధీరుడెప్పుడూ స్వశక్తిపైనే నిలబడతాడు, మార్గదర్శకుడౌతాడు.

-శంకరకింకర