పోటీతత్త్వం

శ్రీ గురుభ్యోన్నమః

ఈ చిన్ని కథ మనలో చాలా మందికి తెలిసినదే ఐనా మొన్న మా గురువుగారి నోట మరోసారి వినడంతో అందరితో పంచుకుందామన్న ఉద్దేశ్యంతో పంపుతున్నాను.

నేటి  విద్యా విధానాలు, జీవన విధానాలు ఒకటేమిటి అన్నీ కాంపిటీటివ్‍నెస్స్ తో, పోటీ తత్త్వంతో సాగుతున్నాయి. దానివల్ల పొందేది సింహభాగం అనర్థం, ఎక్కడో అతి కొద్ది ప్రయోజనం ఉండచ్చు. ఆఖరికి ఈ పోటీతత్త్వం ఆధ్యాత్మిక జీవనంలో కూడా ప్రవేశించి. అసలు ఆధ్యాత్మికతను మరుగున పడేసి ఆడంబరాలను, డాంబికాలను ప్రోత్సహిస్తోంది... సాధనలో ఎన్నోమెట్లు ఎక్కినవారే దీనికి లోనౌతుంటే, ఇక సామాన్యుల సంగతి చెప్పఖ్ఖర్లేదుగా.. ఈ పోటీతత్త్వమే రాను రానూ స్పర్థలకి దారితీస్తోంది.

ఇక కథలోకి వస్తే...కథ పాతదే. పైన చెప్పిన ఉపోద్ఘాతం, చేప్తున్న నేను కొత్త అంతే..

పూర్వం ఒకానొక గ్రామంలో ఇద్దరు అన్నదమ్ములుండేవారు, వారిని చిన్నప్పట్నుంచీ వారి తల్లిదండ్రులు అందట్లోనూ గొప్పవారు కావాలన్న ఉద్దేశ్యంతో పుత్ర వాత్సల్యంతో వారిని వివిధ శాస్త్ర పారంగతులని చేయడంలో ఇతరులతోటి సామం చూపి పోటీతత్త్వాన్ని పెంపొందించారు, చివరకి వారి మధ్యనే వారికి పోటీ పెరిగింది. ఆ తల్లిదండ్రులు కోరుకున్నట్టు వారికి విద్యావిషయాలలో పోటీ పెరిగి వారు చదువుకున్న దాంట్లో వారు నైపుణ్యం సంపాదించారు. కానీ..... వారి నరనరాల్లో ఆ పోటీ తత్త్వం ఇమిడి పోయింది. అలా చాలా రోజులు జరిగాయి..

ఒకనాడు ఆ ఇద్దరూ భగవంతుని గూర్చి తపస్సు చేసి అనుగ్రహం పొందాలనుక్కున్నారు. అలా తపస్సు చేయడంలో కూడా పోటీ పడ్డారు, ఎవరికి తొందరగా భగవంతుడు దర్శనమిచ్చి వరమిస్తాడో అన్న విషయం నుంచి ఎవరికి గొప్ప వరం పొందుతారో అన్నంత వరకూ పోటీ పడ్డారు. అలా ఇద్దరూ ఒక అడవికి చేరి తపస్సు చేద్దామని ప్రయత్నించారు. ఒక పెద్ద చెట్టును చూసి అక్కడ తపించాలనుక్కున్నారు. మళ్ళీ అక్కడా పోటీతత్త్వం వారిని గెలిచింది.. ఒకడు చెట్టు క్రింద కూర్చుని తపస్సు చేద్దామనుక్కుంటే ఇంకొకడు చెట్టు చివర కొమ్మలపై కూర్చుని తపస్సు చేద్దామనుక్కున్నాడు కారణం వాడి తలపులో భగవంతుడు పైనుంచి క్రిందకి దిగేటప్పుడు మొదట వాణ్ణి అనుగ్రహించి క్రిందివాడిదగ్గరకెళ్ళాలని తపస్సు చేయసాగాడు... వారి తపస్సులో సాత్వికతలేకుండా పోయింది... అక్కడా ఈ కాంపిటీటివ్‍నెస్స్ విజృంభించింది.  అలా కొన్ని రోజులు గడిచాయి... భగవంతుడు వారి నిశ్చల తప్పస్సుకు మెచ్చి భగవంతుడు వారికి వరాలివ్వడానికి క్రిందికి దిగివచ్చి చెట్టు చిటారు కొమ్మ మీద ఉన్నవాడ్ని వరం అడిగాడు. వాడు ఏం వరమడిగినా క్రిందివాడు తనకన్నా ఎక్కువ ఏదైనా అడుగుతాడేమో అన్న భావనతో భయపడి క్రిందివాడేది అడిగితే దానికి రెండింతలు నాకిమ్మని కోరాడు. సరే అని భగవంతుడు చెట్టుకింద తపస్సు చేసుకుంటున్నవాడి దగ్గరకి వెళ్ళి ఏంకావలని అడగగా,వాడు ఆలోచించి, తనతో పుట్టినవాడు ఎలా ఆలోచిస్తాడో గుర్తెరిగినవాడు కావటం చేత భగవంతుడా నాకు ఒక చెయ్యి, ఒక కాలు, ఒక కన్ను పని చేయకుండా చేయమని కోరాడు. అంటే ఈ పోటీ తత్త్వంతో పెరిగిన స్పర్థలవల్ల తన తోబుట్టువు గెలవకూడదు భగవద్విషయంలోనూ తానే గెలవాలన్న మంకుపట్టుతో తనకి ఒక కాలు, చెయ్యి, కన్ను పోయినా తమ్ముడికి రెండూ పోతే తానే గెలిచినట్టు భావించాడు అదే గెలుపనుక్కున్నాడు.

ఇదీ ప్రస్తుత కాంపిటీటివ్‍నెస్స్ యొక్క ప్రభావం ఎవరితో పోటీ పడుతున్నామో, ఏ విషయంలో పోటీ పడుతున్నామో, దాని పర్యవసానాలేమో తెలియకుండానే, అక్షరాభ్యాసంనుంచే వారికి పోటీ తత్త్వం అలవాటు చేసి వారి ఆలోచనా సరళిని, భావిజీవితపు పునాదులను నిర్వీర్యం చేస్తున్నాం మనం.

కనీసంలో కనీసం ఈ పోటీలు ఆధ్యాత్మికతను దూరంగా ఉంచితే బాగుండు అది ఇప్పుడు ఇక్కాడా రాజ్యం చేయాలని చూస్తోంది. పోటీలేకుండా అందరం కలిసి సామరస్యంగా ముందుకు సాగడం ఉత్తమం. ఎవరి శక్తి మేర వారు ముందు వెనకలుగా ఉంటారు అంతే...

సర్వం గురుచరణారవిందార్పణమస్తు

-శంకరకింకర

03-Dec-12