నిన్ను నువ్వు తప్ప ఎవ్వరూ ఉద్ధరించలేరు. ఎవ్వరూ పాడు చేయనూలేరు

శ్రీ గురుభ్యోనమః

సదాశివ సమారమ్భామ్ వ్యాస శంకర మధ్యమామ్

అస్మదాచార్య పర్యంతామ్ వందే గురుపరంపరామ్

’ఉద్ధరేత్ ఆత్మనా ఆత్మానమ్’

ఉద్ధరేదాత్మానా ఆత్మానం నాత్మాన మవసాదయేత్ !
అత్మైవ హ్యాత్మనో బన్ధురాత్మైవ రిపురాత్మనః !!

(ఆత్మనా ఆత్మానం ఉద్ధరేత్! ఆత్మానం న అవసాదయేత్! హి ఆత్మనః అత్మ ఏవ బన్ధుః! ఆత్మనః ఆత్మ ఏవ రిపుః!)

ఈరోజు తెల్లవారుఝామునే లేవగానే చూసిన సందేశం ఇది. కొన్ని కొన్ని విషయాలు చూసి కొంచెం చలిత మనస్సుతో ఉన్న నాకు నిద్ర లేవగానే ఈ సందేశం చూసే సరికి ఉలికి పాటు వచ్చింది. అలా అని ఈ సందేశం కొత్తదీ కాదు ఎప్పుడూ విననిదీ కాదు. ఎక్కడో ఏదో అయ్యిందని, ఎవరో ఏదో చేస్తారని ఏదో దొరకలేదని ఎవరో ఇవ్వలేదని అందువల్ల ఏదో కలగలేదని ఆలోచన చేయక నీ కర్తవ్యం నువ్వు నిర్వహించు అన్నట్లుగా ఒక పెద్దాయన ద్వారా ఈ సందేశం అందింది.

ఆహా జగద్గురుబోధ అంటే అదే కదా... ఎవరిని వారు ఉద్ధరించుకోవాలి, ఎవరిని వారు సంస్కరించుకోవాలి. పరిశీలన చేయాలి, పరిష్కరించుకోవాలి. మిత్రుత్వం నెరపేవారు, బంధువులూ నిన్ను ఉద్ధరించలేరు, అలానే నీ శత్రువులూ నిన్ను అథోగతి పాలు చేయలేరు. లౌకింకంగా కొంత ప్రభావం చూపగలరేమో, నిన్ను నువ్వు తప్ప ఎవ్వరూ ఉద్ధరించలేరు. ఎవ్వరూ పాడు చేయనూలేరు.

కృష్ణం వందే జగద్గురుమ్ 🙏🙏🙏

-శంకరకింకర