శ్రీకృష్ణస్తోత్రం రాధాకృతం

 

శ్రీకృష్ణస్తోత్రం రాధాకృతం 
గోలోకనాథ గోపీశ మదీశ ప్రాణవల్లభ .
హే దీనబంధో దీనేశ సర్వేశ్వర నమోఽస్తు తే .. 1..

గోపేశ గోసమూహేశ యశోదాఽఽనందవర్ధన .
నందాత్మజ సదానంద నిత్యానంద నమోఽస్తు తే .. 2..

శతమన్యోర్భగ్నమన్యో బ్రహ్మదర్పవినాశక .
కాలీయదమన ప్రాణనాథ కృష్ణ నమోఽస్తు తే .. 3..

శివానంతేశ బ్రహ్మేశ బ్రాహ్మణేశ పరాత్పర .
బ్రహ్మస్వరూప బ్రహ్మజ్ఞ బ్రహ్మబీజ నమోఽస్తు తే .. 4..

చరాచరతరోర్బీజ గుణాతీత గుణాత్మక .
గుణబీజ గుణాధార గుణేశ్వర నమోఽస్తు తే .. 5..

అణిమాదికసిద్ధీశ సిద్ధేః సిద్ధిస్వరూపక .
తపస్తపస్వింస్తపసాం బీజరూప నమోఽస్తు తే .. 6..

యదనిర్వచనీయం చ వస్తు నిర్వచనీయకం .
తత్స్వరూప తయోర్బీజ సర్వబీజ నమోఽస్తు తే .. 7..

అహం సరస్వతీ లక్ష్మీర్దుర్గా గంగా శ్రుతిప్రసూః .
యస్య పాదార్చనాన్నిత్యం పూజ్యాస్తస్మై నమో నమః .. 8..

స్పర్శనే యస్య భృత్యానాం ధ్యానే చాపి దివానిశం .
పవిత్రాణి చ తీర్థాని తస్మై భగవతే నమః .. 9..

ఇత్యేవముక్త్వా సా దేవీ జలే సన్న్యస్య విగ్రహం .
మనఃప్రాణాంశ్చ శ్రీకృష్ణే తస్థౌ స్థాణుసమా సతీ .. 10..

రాధాకృతం హరేః స్తోత్రం త్రిసంధ్యం యః పఠేన్నరః .
హరిభక్తిం చ దాస్యం చ లభేద్రాధాగతిం ధ్రువం .. 11..

విపత్తౌ యః పఠేద్భక్త్యా సద్యః సంపత్తిమాప్నుయాత్ .
చిరకాలగతం ద్రవ్యం హృతం నష్టం చ లభ్యతే .. 12..

బంధువృద్ధిర్భవేత్తస్య ప్రసన్నం మానసం పరం .
చింతాగ్రస్తః పఠేద్భక్త్యా పరాం నిర్వృతిమాప్నుయాత్ .. 13..

పతిభేదే పుత్రభేదే మిత్రభేదే చ సంకటే .
మాసం భక్త్యా యది పఠేత్సద్యః సందర్శనం లభేత్ .. 14..

భక్త్యా కుమారీ స్తోత్రం చ శృణుయాద్వత్సరం యది .
శ్రీకృష్ణసదృశం కాంతం గుణవంతం లభేద్ధ్రువం .. 15..

ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే 
గోపికావస్త్రహరణప్రస్తావోనామ సప్తవింశోఽశ్యాయే
రాధాకృతం శ్రీకృష్ణస్తోత్రం సంపూర్ణం .