Pages

Thursday, April 9, 2020

శ్రీమాతఙ్గీ స్తుతిః

శ్రీమాతఙ్గీ స్తుతిః 
మాతఙ్గీం నవయావకార్ద్ర చరణాముల్లాసి కృష్ణాంశుకాం
వీణాపుస్తక ధారిణీం నతకుచాం ముక్తాప్రవాలావలిమ్ ।
శ్యామాఙ్గీం శశిశఙ్ఖకుణ్డలధరాం దన్తప్రభాసుస్మితాం
ఆకర్ణాలక-వేణి-కఞ్జ-నయనాం ధ్యాయేచ్ఛుక శ్యామలామ్ ॥ ౧॥

కర్పూర శోభి కర్ణాభరణాభిరామాం మాణిక్యభూషాం సుముఖారవిన్దామ్ ।
హాలామదాఘూర్ణిత లోచనాభాం బాలాం భజే బాలతమాల నీలామ్ ॥ ౨॥

కస్తూరీ తిలకాభిరామ రచితా కర్పూర తాటఙ్కినీ
బాలా నీలవిశాలచారువదనా ప్రాలమ్బిధమ్మిల్లకా ।
హారోదఞ్చిత పీవరస్తనతటీ హాలామదోల్లాసినీ
శ్యామా కాచన మోహినీ విజయతే చఞ్చత్ప్రపఞ్చీకృతా ॥ ౩॥

అంశే వేణీం చికురకుసుమాం చూలికాం నీలచేలాం
ముక్తాభూషాఙ్కరయుగలతాం వల్లకీం వాదయన్తీమ్ ।
మాధ్వీమత్తాం మధుకర నినదాం శ్యామలాం కోమలాఙ్గీం
మాతఙ్గీం తాం సకలఫలదాం సన్తతం భావయామి ॥ ౪॥

వీణా పుస్తక ధారిణీం స్మితముఖీం తాలీదలాకల్పిత
స్ఫాయత్కుణ్డలభూషణాం కువలయశ్యామాం కురఙ్గీదృశీమ్ ।
ఉత్తుఙ్గస్తనకుమ్భయుగ్మ విలసత్కాశ్మీరపత్రావలీం
మాతఙ్గీం పదకైరవం నవచరచ్చన్ద్రాతపత్రామ్భజే ॥ ౫॥

ధ్యాయేహం రత్నపీఠేశుకకులరణితం శృణ్వతీం శ్యామలాఙ్గీం
న్యస్తైకాఘ్రిం సరోజే శశిశకలధరాం వల్లకీంవాదయన్తీమ్ ।
కల్హ్నారాబద్ధమాలాం నియమితవిలసచ్చూలికాం రక్తవస్త్రాం
మాతఙ్గీం శఙ్ఖపాత్రాం మధుమదవివశాం చిత్రకోద్భాసిభాలామ్ ॥ ౬॥

ఆరాధ్యమానాశ్చరణాం పిబన్తోబ్రహ్మాదయో విశ్రుత కీర్తిమాపుః ।
అన్యేపరం వాగ్విభవం మునీన్ద్రా పరాంశ్రియం భక్తిభరేణ చాన్యే ॥ ౭॥

నమామి దేవీం నవచన్ద్రమౌలిం మాతఙ్గినీం చన్ద్రకలావతంసామ్ ।
ఆమ్నాయ వాక్యైః ప్రతిపాదనార్థే ప్రబోధయన్తీం శుకమాదరేణ ॥ ౮॥

మాతఙ్గలీలా గమనేఽపి భక్త్యా శిఞ్జానమఞ్జీరమిషాద్భజన్తి ।
మాతస్త్వదీయం చరణారవిన్దమకృత్రిమాణాం వచసాం నిరిచ్ఛాః । ౯॥।

పరాధికాశిఞ్జితనూపురాభ్యాం కృతాగమాం పదవీం తాం పదాభ్యామ్ ।
ఆస్ఫోటయన్తీం కరవల్లకీం తాం మాతఙ్గినీం మద్ధృదయే భజామి ॥ ౧౦॥

నీలాంశుకాబద్ధనితమ్బబిమ్బాం నాలీదలేనానతకర్ణభూషామ్ ।
మధ్యే మదాఘూర్ణిత నేత్రపద్మాం మాతఙ్గినీం శమ్భువధూం నమామి ॥ ౧౧॥

నీలోత్పలానాం శ్రియమావహన్తీం కాఞ్చ్యా కటాక్షైకశుభాం కరాణామ్ ।
కదమ్బ మాలాఙ్కితకేశపాశాం మాతఙ్గకన్యాం హృదిభావయామి ॥ ౧౨॥

స్తుత్యానయా శఙ్కరధర్మపత్నీం మాతఙ్గినీం వాగధిదేవతాం తామ్ ।
స్వర్గంగతిం భక్తజనా మనుష్యాః పరాం శ్రియం భక్తి భరేణ చాన్యే ॥ ౧౩॥

కుచకుమ్భ తటన్యస్త మణివీణామదాలసామ్ ।
శ్యామాం వామాఙ్క విన్యస్త మాలికాం బాలికామ్భజే ॥ ౧౪॥

అబ్ధౌయాతి సరోజచామరమరుద్దోధూయమానాలకా
చూలీచుమ్బిత చారుచమ్పక దలాగౌరీ మదోల్లాసినీ ।
నాలీ బాల పలాశ కర్ణవిలసత్కల్లోల కాలిచ్ఛటా
కాలీ సాచలకన్యకా విజయతే మచ్చిత్త పద్మాసనా ॥ ౧౫॥

వీణానర్తిత పాణి పఙ్కజయుగామాశోణబిమ్బాధరాం
వేణీ బద్ధ కదమ్బ పుష్ప కలికామేణీ విలోలేక్షణామ్ ।
శ్రోణీ లమ్బ విరాజమాన సుజపా శోణామ్బరాలఙ్కృతాం
ఏణాఙ్కార్క విభూషణాం కలయతాం భిల్లీం పురన్ధ్రీమ్భజే ॥ ౧౬॥

తమాల శ్యామాఙ్గీమతిమధుర సఙ్గీత నిరతాం
కృపాపూర్ణాపాఙ్గీం కుచభర నతాఙ్గీం స్మితముఖీమ్ ।
భ్రమద్భ్రూభఙ్గే తే వివిధ కుసుమైస్తైరివయుతాం
భజేఽహం మాతఙ్గీం మదపరవశాఙ్గీమనుదినమ్ ॥ ౧౭॥

సుకశ్యామాం శ్యామాం శుకరణిత కల్లోల నిరతాం
విపఞ్చీ సఞ్చారారుణ కరసరోజాం భగవతీమ్ ।
మదాసక్తాముక్తా ఫలగుణితహారస్తనతటాం
కృపావాసామీశామతిరుచిరహాసాం భజశివామ్ ॥ ౧౮॥

రక్తారవిన్ద మకరన్ద రసానులేపాం
పానప్రమత్త చలితాలి కులాలకాన్తామ్ ।
వీణామనోహరనినాదవినోదశీలాం
వాణీం భజే శుకనిభాం మధుపాన లోలామ్ ॥ ౧౯॥

సఙ్గీత నాద రసపానఘనార్ద్రదేహాం
నేత్రారవిన్ద కరుణామృతవాహినీం తామ్ ।
రక్తారవిన్ద వినివేశితవామపాదాం
శ్యామాం మతఙ్గతనయాం మనసా స్మరామి ॥ ౨౦॥

కస్తూరికా శ్యామల కోమలాఙ్గీం
కాదమ్బరీపానమదాలసాఙ్గీమ్ ।
వామస్తనాలిఙ్గితరత్నవీణాం
మాతఙ్గకన్యాం మనసాస్మరామి ॥ ౨౧॥

స్మరేత్ప్రథమ పుష్పిణీం రుధిరబిన్దు నీలామ్బరాం
గృహీతమధుపాత్రికాం మదవిఘూర్ణ నేత్రోజ్వలామ్ ।
ఘనస్తనభరానతాం గలిత చూలికాం శ్యామలాం
కరస్ఫురిత వల్లకీం విమలశఙ్ఖ తాటఙ్కినీమ్ ॥ ౨౨॥

మాణిక్యవీణాముపలాలయన్తీం మదాలసాం మఞ్జుల వాగ్విలాసామ్ ।
మాహేన్ద్ర నీలోత్పల కోమలాఙ్గీం మాతఙ్గ కన్యాం మనసాస్మరామి ॥ ౨౩॥

కువలయ దలనీలాఙ్గీం కువలయ చారుచఞ్చలాపాఙ్గీమ్ ।
కువలయ సమోత్తమాఙ్గీం కువలయ చూలీం నమామి మాతఙ్గీమ్ ॥ ౨౪॥

శ్యామా కువలయశ్యామా నామకలాధామ భాగస్థా ।
మధుపానరతారతాపాయాద్వాణీ వీణావినోదవిశ్రాన్తా ॥ ౨౫॥

తమాలపత్రాఞ్చితనీలగాత్రీం తాలీదలేనార్పిత కర్ణపత్రామ్ ।
సప్తస్వరాలాపవిశేషతన్త్రీం బాలామ్భజే భవ్యమతఙ్గపుత్రీమ్ ॥ ౨౬॥

నిత్యానుపాత్రార్పితసత్కలాభాం నీలామ్బరోద్భాసినితమ్బబిమ్బామ్ ।
భక్తోపరిన్యస్తకృపావలమ్బాం బాలాం భజే భవ్యగుణాం మదమ్బామ్ ॥ ౨౭॥

శివతనుభవసఙ్గం శివచూలీ లోల చఞ్చలోత్సఙ్గమ్ ।
కలిమల తనుమఙ్గం కలయే మాతఙ్గకన్యకాపాఙ్గమ్ ॥ ౨౮॥

కలాధీశోత్తంసాం కరకలిత వీణాహితరసాం
కలిన్దాపత్యాభాం కరకలిత హృదయాం రక్తవసనామ్ ।
పురాణీం కల్యాణీం  పురమథనపుణ్యోదయకలా-
మధీరాక్షీం వన్దే బహుకుసుమసన్నద్ధకబరీమ్ ॥ ౨౯॥

కలోదఞ్చద్వేణీం కనకదలతాటఙ్కమహితాం
స్తనాభ్యామానమ్రాం తరుణమిహిరాం రక్తవసనామ్ ।
మహాకల్యాణీం తన్మధుమదభరాం తామ్రనయనాం
తమాలశ్యామాం నస్తవకయతు సౌఖ్యానిసతతమ్ ॥ ౩౦॥

కరాఞ్చితవిపఞ్చికాం కలితచన్ద్రచూడామణిం
కపోలవిలసన్మహాకనకపత్ర తాటఙ్కినీమ్ ।
తపః ఫలమిహాశ్రితాం తరుణభాసరక్తామ్బరాం
తమాలదలమేచకాం తరుణలోచనామాశ్రయే ॥ ౩౧॥

మాతా మరకతశ్యామా మాతఙ్గీ మధుశాలినీ ।
కటాక్షయతు కల్యాణీ కదమ్బవనవాసినీ ॥ ౩౨॥

జగదానన్దకలఙ్కకణ్ఠమాలా కబరీ వేష్టన కాఙ్క్షణీయ గుఞ్జా ।
కురుతాం దురితాద్విమోక్షణం మే తుహినా భిల్లికుటుమ్బినీ భవానీ ॥ ౩౩॥

వామే విస్మృతశాలినీ స్తనతటే విన్యస్త వీణాముఖం
తన్త్రీతాల విరావిణీమసకలైరాస్ఫాలయన్తీ నఖైః ।
అర్ధోన్మీలిత లోచనం సవిలసద్గ్రీవం ముఖంవిభ్రతీ
శ్యామా కాచన మోహినీ విజయతే మాతఙ్గకన్యామయి ॥ ౩౪॥

ప్రతిష్ఠా పయోధర ప్రసార కరపఙ్కజం బలభిదః ।
కదమ్బ వనమాలికం శశికలా సముద్భాసితమ్ ॥ ౩౫॥

మతఙ్గ కులనన్దినీ మనసి మే ముహుజృమ్భతామ్ ।
సమస్త సుఖదాయినీ తరుణపత్ర తాటఙ్కినీ ॥ ౩౬॥

లాక్షారాగ కపోలపల్లవరతామాపీన తుఙ్గస్తనీం
కర్పూరోజ్వలచారుశఙ్ఖవలయాం కాశ్మీరరక్తాంశుకామ్ ।
తన్త్రీతాలసపాటలాం గులిదలాం వన్దామహే మాతరం
మాతఙ్గీం మదమన్థరాం మరకతశ్యామాం మనోహారిణీమ్ ॥ ౩౭॥

స్రస్తం కేతకిదామభిర్వలయితం ధమ్మిల్లమాబిభ్రతీ
తాలీపత్ర పుటాన్తరైః సమనతైస్తాటఙ్కినీ మౌక్తికైః ।
భాలే కల్పతరోః ప్రసూనవిలసదృష్ట్వైవ సమ్మోహినీ
కాఞ్చీ దామవతీ విజయతే వీణాసవాదాననా ॥ ౩౮॥

మాతఙ్గీం భూషితాఙ్గీం మధుమదముదితాం ఘూర్ణమానాక్షియుగ్మాం
స్విద్యద్వక్త్రాం కదమ్బ ప్రవిలసద్వేణికామత్త వీణామ్ ।
బిమ్బోష్ఠీం రక్తవస్త్రాం మృగమద తిలకామిన్దురేఖావతంసాం
కర్ణోద్యచ్ఛఙ్ఖపత్రాం కరకలితశుకాం నౌమి తుఙ్గస్తనీం తామ్ ॥ ౩౯॥

ఉన్మీలిద్యావకాద్యాన్నివిడమదభరోద్విగ్నభాలాలకాశాం
రత్నగైవేయహారాఙ్గద కటిలసత్సూత్ర మఞ్జీరఘోషామ్ ।
ఆనీయార్థానభీష్టాన్ స్మితమధురదృశా సాధికం తర్పయన్తీం
ధ్యాయేద్దేవీం శుకాభాంశుకమఖిలకలారూపమస్యాశ్చపార్శ్వే ॥ ౪౦॥

వేణీమూల విలాసితేన్దు శకలాం వీణానినాదప్రియాం
క్షోణీపాల సురేన్ద్ర పన్నగగణై రారాధితాఙ్ఘ్రిద్వయామ్ ।
ఏణీచఞ్చలలోచనాం సువదనాం వాణీం పురాణోజ్వలాం
శ్రోణీభారభరాలసామనిమిషాం పశ్యామి విశ్వేశ్వరీమ్ ॥ ౪౧॥

కుచకలశనిషణ్ణవీణాం కలమధురధ్వని కమ్పితోత్తమాఙ్గీమ్ ।
మరకతమణిభాగమేచకాభాంమదమవిరోధమనస్వినీముపాసే ॥ ౪౨॥

తాలీదలోల్లసితకోమలకర్ణపాలీం ఫాలాన్తరాచికురామతినీలవేణీమ్ ।
వక్షోజపీఠనిహితోజ్వలచారువీణాం శ్యామాం నమామి మదిరారుణనేత్రయుగ్మామ్ ॥ ౪౩॥

మధ్యేబద్ధమయూఖపిచ్ఛనికరాం శ్యామామ్ప్రబాలాధరాం
భృఙ్గీవాదనతత్పరాం సునయనాం మూర్ధాలకైర్బర్బరామ్ ।
గుఞ్జాహారధరాం సమున్నతకుచాం చన్ద్రాననాం శామ్భవీం
భిల్లీ వేషధరాం నమామి శబరీ తామేకవీరాం పరామ్ ॥ ౪౪॥

లసత్గుఞ్జాహార స్తనభర సమున్మధ్యలతికా
ముదఞ్చత్స్వేదామ్భః క్షణగణిత ఫేనోద్గమ రుచిమ్ ।
శివం శాన్తం పాత్రప్రవణమృగయాకారకరణం
శివామమ్బజ్ఞాతిం చరణమహమన్వేమిశరణమ్ ॥ ౪౫॥

నటదగుఞ్జా పఞ్జాభరణకిరణాం రక్తవసనాం
జపాకర్ణాభూషాం శిఖివరక్షకలాపామ్బరవతీమ్ ।
నదజ్ఝల్లీ వల్లీనవకిసలయైస్తాం పరివృతాం
నవామోహారూఢాం కుటిలకబరీం మోహశబరీమ్ ॥ ౪౬॥

గలే గుఞ్జా పుఞ్జావలి మపి చ కర్ణే శిఖిశిఖాం
శిరో రఙ్గే నృత్యత్కనకదల దూబ మఞ్జులదలమ్ ।
ధనుర్వామే చాపే శరమపరపాణౌ నిదధతీం
నితమ్బే బర్హాలిం కుటిలకబరీం నౌమి శబరీమ్ ॥ ౪౭॥

వీణావాదన నిరతం తల్లీలా బద్ధగీత వామకుచమ్ ।
శ్యామల కోమల గాత్రం పాటలనయనం పరం భజేధామ ॥ ౪౮॥

అఙ్కిత పాణిచతుష్ట్యమఙ్కుశపాశేక్షు చాపశకలమ్ ।
శఙ్కర జితేత్యమిత్రం పఙ్కజనేత్రం పరం భజేధామ ॥ ౪౯॥

కరకలిత కేసారాలానుకారేయం కుచకలశా జయతే జగతామ్ ।
మాతామాతఙ్గీ మఙ్గేస్వాయతనా ॥ ౫౦॥

ముదాకరకదమ్బ కాననే కనకమష్టపాత్రస్థితే
లసన్మణిమయాసనే సహచరీభిరారాధితామ్ ।
లసత్కనకకఙ్కణాం రజతమఞ్జుమఞ్జీరకాం
జగజ్జనవిమోహినీం జపవిధౌ స్మరేదమ్బికామ్ ॥ ౫౧॥

అకృశా కుచయోర్విలగ్నే విపులం వక్షసి విస్తృతం నితమ్బే ।
అరుణాధరమావిరస్తుచిత్తే కరుణాశాలి కపాలి భాగధేయమ్ ॥ ౫౨॥

వీణాతాల వినోదగీత నిరతాం నీలాంశుకోల్లాసినీం ।
బిమ్బోష్ఠీం నవయావకార్ద్ర చరణామాకీర్ణ కేశోజ్వలామ్ ॥ ౫౩॥

హృద్యావేశిత శఙ్ఖకుణ్డలధరాం మాణిక్యభూషోజ్వలాం
మాతఙ్గీం ప్రణతోఽస్మి సుస్మితముఖాం దేవీంశుకశ్యామలామ్ ॥ ౫౪॥

దివ్యహాలామదోన్మత్తాం దివ్యభూషణభూషితామ్ ।
దివ్యగన్ధర్వకన్యాభిస్సమారాధితపాదుకామ్ ॥ ౫౫॥

దివ్యసింహాసనాసీనాం శుకవీణాలసత్కరామ్ ।
సఙ్గీత మాతృకాం వన్దే వరదాం సుస్మితాననామ్ ॥ ౫౬॥

స్తుతిషు నవదేవ దేవి వివిధ కవి విలోహితమతిర్భవతి ।
నిహితమతిర్యద్యపి మామపేతచేతీభవతి స్తోతుం విలోభయతి ॥ ౫౭॥

సాధ్యాక్షరగర్భిత పఞ్చనవ ఇత్యక్షరాత్మికే జగన్మాతః ।
భగవతి మాతఙ్గేశ్వరి నమస్తుభ్యం మహాదేవి ॥ ౫౮॥

ఇత్యుమా సాహచర్యా భగవాన్మాతఙ్గఋషిప్రణీతా ఇయం స్తుతిః సమాప్తా ।


Add caption

No comments:

Post a Comment