Pages

Tuesday, June 26, 2018

మూకపఞ్చశతి -స్తుతి శతకము - 001


శ్రీ గురుభ్యోనమః

తన్నోదంతిః ప్రచోదయాత్

మూకపఞ్చశతి -స్తుతి శతకము - 001

పాణ్డిత్యం పరమేశ్వరి! స్తుతివిధౌ నైవాశ్రయన్తే గిరాం
వైరిఞ్చాన్యపి గుమ్ఫనాని విగలద్గర్వాణి శర్వాణి! తే
స్తోతుం త్వామ్ పరిఫుల్లనీలనలినశ్యామాక్షి! కామాక్షి! మాం
వాచాలీకురుతే తథాపి నితరాం త్వత్పాదసేవాదరః!!

(జగద్గురు శ్రీ శ్రీ శ్రీ మూకశంకరుల విరచిత స్తుతి శతకారంభశ్లోకము)

అమ్మా! పరమేశ్వరీ! విప్పారిన నల్ల కలువలవంటి కన్నులు గల ఓ కామాక్షీదేవీ! ఓ శర్వాణీ!  నిన్ను స్తుతించడం అనే విషయంలో బ్రహ్మకు సంబంధించిన వాక్కులయొక్క గాంభీర్యము పటుత్వము కూడా పాండిత్యాన్ని పొందలేక జారిపోతున్నవే! అటువంటి గొప్ప కర్మ యైన నిన్ను స్తుతించుట అనే విషయమందు  నీ పాదములజంటపై నాకున్న ఆదరము నిన్ను స్తుతిస్తున్నాను అన్న పేర వాచాలుణ్ణి చేయుచున్నది. (మన్నించి కనికరించుమో జననీ!)

-శంకరకింకర

స్తుతి శతకం ఆరంభంలో బ్రహ్మగారిని వారి వాక్కులను స్పృంశించారు మూక శంకరులు. క అనే అక్షరం బ్రహ్మను సూచిస్తుంది. ఆ బ్రహ్మయొక్క వాక్కులు అనగా వేదములు లేదా ఆయన శక్తియైన సరస్వతీదేవి అనగా సమస్త వాఙ్మయము అన్ని పలుకుల సారముగా పరిగణిస్తే ఆపలుకులే అమ్మను నుతి చేసి పాండిత్యాన్ని సాధించి అమ్మ పాదములను పొందలేకపోతున్నవట.

అంశపంచకములో నామరూపములను శబ్దార్థములుగా గ్రహిస్తే, శబ్దార్థములు పార్వతీ పరమేశ్వరులని కదా ప్రమాణము, అదే కదా  కాళిదాసా భట్టారకుడు వాగర్థావివసంపృక్తౌ అన్న శ్లోకములో ప్రతిపాదన చేసి రూఢి చేసినది. ఈ శబ్దార్థములు పార్వతీ పరమేశ్వరులైతే, ఆ శబ్దార్థములను ఛందోబద్ధము చేసి పద్యరూపముగానో శ్లోకరూపముగానో నుతిస్తే దేనిని నుతియుంచినట్లు? ఛందస్సు విరాట్పురుషుని పాదములైతే ఆ ఛందస్సు నాధారం చేసుకున్న శ్లోకములు వాని ప్రతిరూపమేగదా! అన, స్తుతిరూపమౌ సమస్త వాఙ్మయమూ శ్లోకములు, పద్యములు వాని పాదములు పరమేశ్వర స్తుతులు పరోక్షంగా పరమేశ్వరీ రూపమే అన, పరమేశ్వర స్తుతి రూపములు. అనగా వేదాది సమస్త వాఙ్మయమూ పరమేశ్వరీస్తుతిరూపమైనప్పుడు అవి పదములతోగూడి పాదములై నడచుచున్నప్పుడు ఆపాదముల మీద అనురక్తియే అమ్మవారి పాదములజంటమీద స్తుతి చేయగలిగే అనురక్తిని కూడా కలిగించుచున్నది అని మూక శంకరుల ప్రతిపాదన. ఈ వాక్కులన్ని ఆ బ్రహ్మ అధీనమందుండి ఎల్లెడలా స్వాధ్యాయము చేయబడుతున్నవి.

వైదిక ఛందస్సు పరాతత్వానికి పాదములని తెల్పబడినందున దానిననుగమించు పద్య రూపములు, శ్లోకరూపములు ఆమె పాదములే అగుచున్నవి. అందువలన అవి ‘పాదములను’ పేరు సార్థక్యము చేసుకున్నవి. పార్వతీ పరమేశ్వరుల రెండు జంటల పాదములుగా లేదా అర్థ నారీశ్వర స్వరూపమున చెరియొక పాదముగానూ ఆ పాదములే  శ్లోక/పద్యరూపమును పొంది అనుగ్రహించుచున్నవి. అంటే, ఆమె పాద సేవాదరమే (ఛందోబద్దమగు స్తుతిరూపములే) ఆమె యందు భక్తిచేత ఆపాదములను స్తుతించు శక్తిని కలిగించుచున్నది తప్ప, నేను వ్రాయగలను స్తుతించగలను అన్న శక్తి, అహం భావము కాదు కాదు అని ప్రతిపాదన. -శంకరకింకర


ఈ విధమైనటువంటి శ్లోకమే మునుపు పుష్పదంతుడు శివమహిమ్నాస్తోత్రమందు పలికెను.. మహిమ్నః పారం తే పరమవిదుషో యద్యసదృశీ
స్తుతిర్బ్రహ్మాదీనామపి తదవసన్నాస్త్వయి గిరః ... అంటూ బ్రహ్మాది దేవతలే నీ స్తుతి చేయలేకున్నారని ఈ శ్లోకము ఆ శ్లోకమును స్ఫురణకు తెచ్చుచూ... మహా మహా పండితులు భక్తాగ్రేసరులైనవారి వినయ సంపదను ప్రకటించును - శంకరకింకర



No comments:

Post a Comment